Fisa Llwybr Graddedigion y DU (DU)

Crynodeb a Chyfrifoldebau

Mae’r fisa Llwybr Graddedigion yn fisa gweithio hyblyg a chynhwysol ar gyfer y cyfnod ar ôl astudio sy'n rhoi'r cyfle i fyfyrwyr cymwys a noddir gan Brifysgol Abertawe aros yn y DU a gweithio, neu chwilio am waith, ar unrhyw lefel sgiliau am 2 flynedd (3 blynedd ar gyfer myfyrwyr doethurol) wedi i’w gradd gael ei dyfarnu. Gall y gwaith fod mewn unrhyw sector ac ar unrhyw lefel heb ofynion o ran isafswm cyflog neu'r angen am nawdd fisa. Caniateir astudio hefyd o dan y llwybr hwn, ac eithrio astudio a ddylai gael ei noddi o dan y fisa llwybr myfyrwyr.

Mae'r tîm Gwasanaethau Cydymffurfiaeth Myfyrwyr yn gyfrifol am roi gwybod i'r Swyddfa Gartref am yr holl fyfyrwyr sy'n gymwys ar gyfer y Llwybr Graddedigion, er mwyn galluogi myfyrwyr cymwys i wneud ceisiadau dilys. Ond, cyfrifoldeb y myfyriwr yw rheoli ei gymhwysedd ar bob cam o'i daith gyda Phrifysgol Abertawe. Bydd cwblhau eich cwrs ar amser yn caniatáu mynediad didrafferth at y fisa Llwybr Graddedigion; gallai unrhyw newidiadau i'ch astudiaethau effeithio ar eich cymhwysedd.Crëwyd y dudalen hon i esbonio’n glir ofynion cymhwysedd y fisa Llwybr Graddedigion gan gefnogi myfyrwyr i ddiogelu eu dyheadau mewnfudo at y dyfodol, mewn perthynas â’r fisa llwybr graddedigion .

Cymhwysedd a'r Broses Adrodd

O fewn 21 diwrnod i radd gael ei dyfarnu bydd pob myfyriwr sy’n gymwys ar gyfer y Llwybr Graddedigion yn derbyn e-bost gan y tîm Gwasanaethau Cydymffurfiaeth Myfyrwyr yn rhoi gwybod bod y Swyddfa Gartref wedi cael gwybod ei fod wedi llwyddo i ennill cymhwyster sy’n ei wneud yn gymwys ar gyfer y Llwybr Graddedigion, ac y gall fwrw ymlaen i gwblhau ei gais am y Llwybr Graddedigion (os y gall fodloni meini prawf cymhwysedd eraill). Nid oes rhestr aros ac nid oes angen rhoi gwybod i'r Brifysgol eich bod am gyflwyno cais ar gyfer y Llwybr Graddedigion. Gallwn sicrhau myfyrwyr y mae eu fisâu ar fin dod i ben, y byddant yn cael eu blaenoriaethu a bydd y broses adrodd yn cael ei chwblhau o fewn 5 niwrnod gwaith (o fewn 48 awr lle bo modd). Bydd yr e-bost yn manylu ar bopeth sydd ei angen er mwyn cyflwyno cais am y Llwybr Graddedigion. Ni allwch gwblhau cais am y Llwybr Graddedigion cyn i chi gael yr e-bost hwn ond gellir paratoi cais ymlaen llaw yma.

Er mwyn sicrhau y gallwch barhau i fod yn gymwys i dderbyn yr e-bost hwn, a gwneud cais dilys am y Llwybr Graddedigion ar ôl ei dderbyn, rydym yn argymell yn gryf eich bod yn cymryd yr amser i ddarllen a deall yr holl wybodaeth gymhwysedd isod:

Rhaid i chi fod yn y DU pan fyddwch yn ymgeisio

Gallwch wneud cais am y Llwybr Graddedigion dim ond pan fyddwch yn y DU.

Mae’r cyfnod pan y gallwch ymgeisio ar gyfer y Llwybr Graddedigion yn dechrau ar y diwrnod mae Prifysgol Abertawe yn cadarnhau i chi ei bod wedi rhoi gwybod i’r Swyddfa Gartref eich bod wedi llwyddo i gwblhau cymhwyster sy’n gymwys ar gyfer y Llwybr Graddedigion (fel uchod), ac yn gorffen pan ddaw eich caniatâd myfyriwr presennol i ben.Ni chaiff y Swyddfa Gartref ei hysbysu eich bod wedi ennill cymhwyster nes bod y canlyniadau wedi’u cadarnhau a'u cyhoeddi ar systemau'r Brifysgol (gweler yr adrannau isod). Cyn belled â'ch bod yn gwneud cais o fewn y cyfnod hwn, caiff eich caniatâd myfyriwr ei estyn yn awtomatig nes y ceir canlyniad eich cais ar gyfer y Llwybr Graddedigion, hyd yn oed pan fydd eich caniatâd myfyriwr wedi dod i ben. Dyma un o egwyddorion cyffredinol cyfraith mewnfudo'r DU a elwir yn ganiatâd 3C.

Pan fyddwch wedi gwneud eich cais rhaid i chi aros yn y DU wrth ddisgwyl am y penderfyniad.

Rhaid i chi fod yn fyfyriwr a noddir gan Brifysgol Abertawe (Fisa Haen 4/Myfyriwr)

Rhaid i chi fod yn fyfyriwr a noddir gan Brifysgol Abertawe sydd â fisa Myfyriwr dilys neu fisa Haen 4 (Cyffredinol) pan fyddwch yn gwneud cais (ni ddylai eich caniatâd myfyriwr presennol fod wedi dod i ben).

Ni allwch newid i'r Llwybr Graddedigion o unrhyw fath arall o ganiatâd mewnfudo. Gallwch wneud cais os oes gennych ganiatâd ar hyn o bryd fel swyddog sabothol i fyfyrwyr os mai Fisa Myfyriwr neu Haen 4 (Cyffredinol) oedd eich caniatâd diwethaf.

Os cawsoch ganiatâd gynt o dan y Llwybr Graddedigion neu’r DES (Cynllun Estyniad Doethuriaeth) ni allwch wneud cais am y Llwybr Graddedigion eto am weddill eich bywyd.

Rhaid i chi fod wedi ennill cymhwyster cymwys ar gyfer y Llwybr Graddedigion

I fod yn gymwys, rhaid i chi fod wedi ennill gradd baglor y DU, gradd meistr y DU, PhD y DU neu ddoethuriaeth broffesiynol y manylir arni yn eich CAS (Cadarnhad Derbyn i Astudio). Nid yw cymwysterau ymadael yn gymwys. Mae cymwysterau cymwys eraill yn cynnwys cymwysterau sy'n ofynnol yn ôl cyfraith y DU er mwyn ymgymryd â phroffesiynau megis - ond heb fod yn gyfyngedig i’r rhain - meddygon meddygol, penseiri, cyfreithwyr, athrawon, a nyrsys. Un enghraifft fyddai TAR (addysg) neu'r LPC (ymarfer cyfreithiol).

Rhaid bod eich gradd wedi cael ei dyfarnu o fewn cyfnod dilysrwydd eich fisa myfyriwr presennol er mwyn gallu gwneud cais cymwys am y Llwybr Graddedigion. Mae'n BWYSIG IAWN darllen yr adran nesaf o'r enw 'rhaid i chi fod wedi derbyn eich canlyniadau'.

Rhaid i chi fod wedi derbyn eich canlyniadau (wedi cwblhau'n llwyddiannus)

Rhaid i chi fod wedi cael eich canlyniadau ac wedi ennill y cymhwyster y manylir arno yn eich CAS er mwyn gallu gwneud cais dilys am y Llwybr Graddedigion.

Os caiff dyddiad diwedd eich cwrs ei estyn, mae’n bosibl y gallai hyn effeithio ar ddilysrwydd eich caniatâd myfyriwr presennol.

Os rhoddir dyddiad gorffen newydd i chi ar gyfer eich cwrs sydd y tu allan i gyfnod dilysrwydd eich caniatâd myfyriwr presennol, rhaid i chi wneud cais am estyniad fisa llwybr myfyrwyr cyn gynted â phosibl. Mae mwy o wybodaeth ar gael yma.

Os rhoddir dyddiad gorffen newydd i chi ar gyfer eich cwrs sydd o fewn cyfnod dilysrwydd eich caniatâd myfyriwr presennol mae'n bwysig bod yn ymwybodol ei bod hi’n bosibl na fydd eich canlyniadau’n cael eu cyhoeddi nes bod eich fisa wedi dod i ben (ac felly'n effeithio ar eich cymhwysedd ar gyfer y Llwybr Graddedigion).

Byddem yn argymell yn gryf eich bod yn siarad â'ch goruchwyliwr/cyfadran i gael gwybod pryd yn union y gallwch ddisgwyl cael eich canlyniadau os cewch estyniad i ddyddiad diwedd eich cwrs ac mae gennych ddiddordeb yn y Llwybr Graddedigion.

Rydym yn awgrymu e-bostio 'yn ddiweddar mae dyddiad gorffen fy nghwrs wedi cael ei estyn, tybed felly a allech roi gwybod i mi ba fwrdd dilyniant a dyfarniadau fydd yn ystyried fy ngwaith a phryd caiff fy nghanlyniadau eu cyhoeddi?'. Defnyddiwch y cyfeiriadau cyswllt canlynol:

Y Gyfadran Meddygaeth, Iechyd a Gwyddor Bywyd: [email protected]. Y Gyfadran Gwyddoniaeth a Pheirianneg: [email protected]. Cyfadran y Dyniaethau a’r Gwyddorau Cymdeithasol:- Yr Ysgol Reolaeth – [email protected]. Yr Ysgol Diwylliant a Chyfathrebu – [email protected] Ysgol y Gyfraith – [email protected]. Ysgol y Gwyddorau Cymdeithasol– [email protected]

Os cadarnheir y bydd eich canlyniadau'n cael eu cyhoeddi o fewn cyfnod dilysrwydd eich caniatâd myfyriwr presennol, yna nid oes angen i chi wneud unrhyw beth.
Os rhoddir gwybod i chi na chaiff eich canlyniadau eu cyhoeddi o fewn cyfnod dilysrwydd eich caniatâd myfyriwr presennol ac rydych am wneud cais am y Llwybr Graddedigion pan fyddwch yn derbyn eich gradd, bydd angen i chi wneud cais am estyniad fisa llwybr myfyrwyr cyn dyddiad diwedd eich cwrs newydd.

Er mwyn cydlynu hyn bydd angen i chi wneud cais am CAS gan ddefnyddio’r teitl canlynol yn eich e-bost 'CAS at ddibenion y Llwybr Graddedigion: [email protected].

Estyniad i'r Fisa Llwybr Myfyrwyr = Dyddiad Newydd ar gyfer Diwedd Cwrs + Cyfnod Cloi Ychwanegol o 4 Mis

Gwybodaeth Bwysig

Dim ond unwaith yn ystod eich oes y gallwch wneud cais am y Llwybr Graddedigion.

Os oes gennych achos Camymddwyn Academaidd yn eich erbyn neu unrhyw ffioedd i’w talu, ni fydd y tîm Gwasanaethau Cydymffurfiaeth Myfyrwyr yn hysbysu UKVI eich bod wedi 'llwyddo i gwblhau cymhwyster cymwys ar gyfer y Llwybr Graddedigion' ac ni fyddant yn cefnogi cais am CAS i estyn eich fisa Llwybr Myfyrwyr.

Os ydych wedi cael eich canlyniadau ac mae angen i chi wneud cais brys am y Llwybr Graddedigion gan fod eich caniatâd myfyriwr ar fin dod i ben (dylech ganiatáu 5 niwrnod gwaith lle y bo'n bosibl) gallwch e-bostio:[email protected].

Fisâu Gwaith ar ôl Astudio eraill

Cafodd y dudalen hon ei chreu er mwyn cyfleu'r gofynion cymhwysedd yn glir ar gyfer y fisa Llwybr Graddedigion. Fodd bynnag, mae llawer o opsiynau eraill i’w hystyried o ran fisa gwaith ar ôl astudio. Argymhellir eich bod yn cymryd yr amser i ymchwilio i'r holl opsiynau sydd ar gael i chi wedi ichi orffen eich cwrs yma.

Mae'r tîm Gwasanaethau Cydymffurfiaeth Myfyrwyr yn cydweithio'n agos iawn â rhyngwladol@bywydcampws sy'n dîm o arbenigwyr mewnfudo hollol gymwysedig ym Mhrifysgol Abertawe. Gall y tîm gynnig cefnogaeth ac arweiniad am ddim i chi ac mae ganddynt wybodaeth fanylach sy'n ymwneud â'r Llwybr Graddedigion a fisâu gwaith ar ôl astudio eraill ar eu tudalennau gwe sydd i'w gweld yma.

Mae Prifysgol Abertawe yn Noddwr Myfyrwyr Trwyddedig UKVI - Hanes Blaenorol

Diweddarwyd Tachwedd 2023